Sempre hai momento para un bo libro e pode gozarse da lectura en calquera lugar.
Ta-tum volo pon moi fácil! Non sabedes que título elixir? Propoñémosvos algúns.
Inmundicia e Roñoso
Texto: Ledicia Costas Ilustración: Laura Catalán Colección Ala Delta Vermella Idade recomendada: A partir de 5 anos
Sinopse: Estrela e Max andan nos colectores do lixo na procura de roupa e comida. Para os demais nenos do barrio non son Estrela e Max, senón Inmundicia e Roñoso, dada a sucidade que acumulan. Unha tarde, os nenos do barrio empúrranos dentro dun colector e atrancan a porta. Alí, Inmundicia e Roñoso descobren un mundo insólito onde cada obxecto agocha unha aventura (ás veces disparatada) que os axudará a sacar o mellor de si.
No corazón da balea
Texto: Antonio Manuel Fraga Ilustración: Xan López Domínguez Colección: Ala Delta Vermella Idade recomendada: A partir de 5 anos
Sinopse: Aicí e mais Reibax son dous irmáns que viven na illa Pepereta. Unha mañá, cando se dirixen á escola, os nenos desvían o seu camiño e entran na carpa dun vello circo. Alí atopan algo abraiante: un enorme submarino con forma de balea! Como chegaría ata ese lugar? Os irmáns deberán resolver varios enigmas para descubrir o misterio que agocha este curioso invento.
O home que sabía voar
Texto: Xabier López López Ilustración: Xan López Domínguez
Colección: Ala Delta Azul Idade recomendada: A partir de 8 anos
Sinopse: A quen non lle gustaría voar? Pois Sansón Lamparte, o protagonista desta historia, sabe facelo ás mil marabillas. Algo bastante normal, diredes vós, se naces nun circo, a túa nai é trapecista e o teu pai un deses arrichados artistas aos que lle chaman homes-bala. Aínda que talvez non sexa algotan normal, non si? Actuacións, xiras, viaxes internacionais… Voar! Será en verdade tan estupendo como parece? Premio Frei Martín Sarmiento, 2017.
A rapaza da fiestra
Texto: Xavier Estévez Ilustración: Fernando Llorente Colección Ala Delta Verde Idade recomendada: A partir de 10 anos
Sinopse: Cando Lucas decide probar o telescopio que lle regalan os pais polo seu aniversario, non imaxina a sorpresa que lle espera do outro lado da súa fiestra. Tras os vidros escachados dunha fábrica en ruínas descobre unha rapaza, coa que empeza a comunicarse con breves mensaxes escritas en cartóns. Co tempo comprenderá a reclusión desa nena e a aparente imposibilidade de servirlle de axuda.
O elefante branco
Texto: Xesús Fraga Colección: Catavento Idade recomendada: A partir de 14 anos
Sinopse: O que ía ser un verán sen sobresaltos, verase transformado nunha aventura grazas a uns avós pacientes, un curmán mentireiro e un vello mago que agocha antigos segredos. Na súa compaña, o mozo protagonista desta novela irá descubríndoos ata mesmo remontarse a un decisivo episodio da II Guerra Mundial. Unha novela na que habitan ilusionistas capaces de deter balas cos dentes, belas damas que traballan para o servizo de espionaxe, trens nocturnos e automóbiles de luxo. Premio Frei Martín Sarmiento, 2014.
