Lecturas diversas e de calidade para todas as idades lectoras

Procuramos nun libro que nos remexa, que nos mire en fite, que fale de asuntos que nos implican. Sexan os que for os intereses, gustos e habelencias de cada lector novo, en Tambre-Edelvives has atopar ese libro que procuras para o teu alumnado.

Libros para gozar en solitario ou na compaña dos outros. Libros para divertirse, evadirse, conmoverse, reflexionar ou vivir aventuras. Obras dos autores e autoras máis salientables do panorama cultural galego, e merecedoras de galardóns como o Ala Delta, o Frei Martín Sarmiento ou os premios da Asociación Galega de Editores.

Sen dúbida, grandes lecturas para grandes lectores! Libros para que todos e todas se sintan representados!

 

Ala Delta Serie Laranxa

A serie máis nova da colección Ala Delta resulta ideal para lectores e lectoras a partir de 4 anos. En letra ligada ou caligráfica e tamén en letra maiúscula, son libros perfectos para os picariños que en nada botarán a ler. Textos breves, moi ilustrados, que enfeitizarán os rapaces e vos servirán para dialogar con eles sobre temas fundamentais da primeira infancia. 

Ala Delta Serie Vermella

Obras para nenos e nenas de primeiro e segundo curso de Primaria, que empezan a gozar da súa autonomía lectora. Libros que favorecen a capacidade comunicativa, a sensibilidade artística e o desenvolvemento do espírito crítico. Miradas singulares sobre temáticas universais que lles revelan aos máis pequenos o mundo máxico da lectura.

Ala Delta Serie Azul

Colección enfocada aos lectores e lectoras de terceiro e cuarto de Primaria, que xa len con pericia e queren lecturas máis longas e divididas en capítulos. Aventuras, misterio, ciencia ficción… Historias para lectores independentes, historias que engaiolan e asemade orixinan reflexións.

Ala Delta Serie Verde

Dirixida aos alumnos de máis de 10 anos, esta serie reúne obras de maior complexidade e extensión. Visións sobre realidades contemporáneas e sobre eses asuntos da existencia humana que xa nos van acompañar toda a vida e que suscitarán reflexións e debates na aula.

Catavento

Na Educación Secundaria, os mozos e mozas xa son lectores experimentados, capaces de enfrontar todo tipo de lecturas, quer polo tipo de contido, quer polo seu estilo formal. A colección Catavento é ideal para fomentar ou descubrir ese gusto e esa capacidade total de comprensión lectora. Historias para maiores de 12 e de 14 anos. Todo un mundo por descubrir!

Agora que xa coñeces os andeis de libros que che brinda Tambre-Edelvives, seguro que terás gana de abrilos e mergullarte nas súas páxinas. Entra en Ta-Tum e comparte cos teus alumnos e alumnas este festival de lecturas. O goce e a diversión están asegurados!